28 மாநிலங்கள், 8 யூனியன் பிரதேசங்கள் உள்ள இந்திய நாட்டின் இரண்டாவது பெண் முதல்வர் என்ற பெருமையை ரேகா குப்தா பெற்றுள்ளார்
The Forecast 1 year ago தேசிய செய்திகள்
நாடு முழுவதும் 21 மாநிலங்களில் பாஜக மற்றும் அந்த கட்சி தலைமையிலான தேசிய ஜனநாயக கூட்டணி ஆட்சி நடைபெறுகிறது. இந்த சூழலில், பாஜகவின் ஒரே பெண் முதல்வர் என்ற பெருமையை ரேகா குப்தா பெற்றுள்ளார். நாட்டில் 28 மாநிலங்கள், 8 யூனியன் பிரதேசங்கள் உள்ளன. இதில், மேற்கு வங்கத்தில் மட்டுமே பெண் முதல்வர் (மம்தா பானர்ஜி) ஆட்சி நடத்துகிறார். அவருக்கு அடுத்து நாட்டின் 2-வது பெண் முதல்வர் என்ற பெருமையை ரேகா பெற்றுள்ளார்.
இவர் கடந்த 1974 ஜூலை 19-ம் தேதி ஹரியானாவின் ஜுலானா பகுதியில் ரேகா குப்தா பிறந்தார். பின்னர் டெல்லி பல்கலைக்கழகத்தில் பயின்றபோது, ஆர்எஸ்எஸ் மாணவர் அமைப்பான அகில பாரதிய வித்யார்த்தி பரிஷத்தில் ரேகா குப்தா இணைந்தார். டெல்லி பல்கலைக்கழக மாணவர் சங்க தலைவராக பணியாற்றினார். பி.காம் முடித்த பிறகு, காஜியாபாத் ஐஎம்ஐஆர்சி கல்லூரியில் சட்டம் பயின்று வழக்கறிஞரானார்.
கல்லூரி காலம் முதலே அரசியலில் தீவிர ஆர்வம் காட்டிய ரேகா குப்தா, டெல்லி மாநகராட்சி தேர்தலில் போட்டியிட்டு 3 முறை கவுன்சிலராக தேர்ந்தெடுக்கப்பட்டார். டெல்லி பாஜகவிலும் பல்வேறு முக்கிய பொறுப்புகளை வகித்தார். ரேகா குப்தா, இத்தேர்தலில் டெல்லி ஷாலிமார் பாக் தொகுதியில் போட்டியிட்டு முதல்முறையாக எம்எல்ஏவாக தேர்வு செய்யப்பட்டார்.
இந்த தேர்தலில் டெல்லி பெண்கள் பெருவாரியாக பாஜகவுக்கு வாக்களித்ததால் 27 ஆண்டுகளுக்கு பிறகு தலைநகரில் பாஜக ஆட்சியை கைப்பற்றியது. எனவே, பெண்களுக்கு மரியாதை செலுத்தும் வகையில் பெண் முதல்வர் பதவியேற்றுள்ளார் என கட்சி வட்டாரங்கள் தெரிவித்துள்ளன.
0 Comments