போலி மருந்துகளின் புழக்கத்தைத் தடுக்க முக்கியமான மருந்துகளின் பொதிகளில் க்யூஆர் குறியீட்டை கட்டாயமாக்கி ஒன்றிய அரசு புதிய அறிவிப்பை வெளியிட்டுள்ளது. இந்த புதிய நடைமுறை 2027 ஜூலை 1 முதல் நாடு முழுவதும் அமலுக்கு வர உள்ளது.
புதிய விதிமுறையின்படி, அனைத்து வகையான தடுப்பூசிகள், புற்றுநோய் சிகிச்சை மருந்துகள், போதைப்பொருள் தொடர்பான மருந்துகள் மற்றும் மனநல சிகிச்சைக்கான மருந்துகளின் முதன்மைப் பொதிகளில் க்யூஆர் குறியீடு இடம்பெற வேண்டும். இந்த குறியீட்டை கைப்பேசி மூலம் ஸ்கேன் செய்வதன் மூலம் மருந்தின் உண்மைத்தன்மையை நுகர்வோரும் மருத்துவர்களும் எளிதாக உறுதிப்படுத்திக் கொள்ள முடியும்.
க்யூஆர் குறியீட்டில் மருந்தின் பெயர், தயாரிப்பு நிறுவனம், தொகுப்பு எண், தயாரிப்பு தேதி, காலாவதி தேதி, உரிம எண் உள்ளிட்ட முக்கிய விவரங்கள் இடம்பெறும். இதன் மூலம் போலி அல்லது தரமற்ற மருந்துகளை அடையாளம் காண்பது எளிதாகும் என்று அதிகாரிகள் தெரிவித்துள்ளனர்.
மருந்து விநியோகச் சங்கிலியில் வெளிப்படைத்தன்மையை அதிகரிப்பதோடு, நோயாளிகளின் பாதுகாப்பையும் இந்த நடைமுறை வலுப்படுத்தும் என அரசு நம்பிக்கை தெரிவித்துள்ளது. மருந்துகளை வாங்கும் பொதுமக்கள் தாங்களே அவற்றின் விவரங்களை சரிபார்க்கும் வசதியும் இதன் மூலம் கிடைக்கும்.
மருந்து தயாரிப்பு நிறுவனங்களுக்கு இந்த மாற்றத்தை நடைமுறைப்படுத்த போதுமான கால அவகாசம் வழங்கப்பட்டுள்ளது. அதற்குள் தேவையான தொழில்நுட்ப ஏற்பாடுகளை செய்து புதிய விதிமுறைகளை பின்பற்ற வேண்டும் என்று அறிவுறுத்தப்பட்டுள்ளது.
இந்த புதிய நடவடிக்கை, போலி மருந்துகளுக்கு எதிரான கண்காணிப்பை வலுப்படுத்தி, பாதுகாப்பான மற்றும் நம்பகமான மருந்து விநியோகத்தை உறுதிப்படுத்தும் முக்கிய முன்னேற்றமாகக் கருதப்படுகிறது.
0 Comments