இந்தியா மற்றும் ஐக்கிய அரபு அமீரகம் இடையே எரிசக்தி ஒத்துழைப்பை வலுப்படுத்தும் முக்கிய ஒப்பந்தம் கையெழுத்தாகியுள்ளது. இந்த ஒப்பந்தத்தின் மூலம் இந்தியாவில் உள்ள கிடங்குகளில் சேமிக்கப்படும் அமீரக கச்சா எண்ணெய் இருப்பு 30 மில்லியன் பேரல்களாக உயர்த்தப்பட உள்ளது.
அதிகப்படுத்தப்படும் இந்த எண்ணெய் இருப்பு, அவசர காலங்களில் இந்தியாவின் எரிசக்தி தேவையை சமாளிக்க உதவும் என அதிகாரிகள் தெரிவித்துள்ளனர். உலகளாவிய சந்தை மாற்றங்கள் மற்றும் விநியோக சிக்கல்களின் போது இந்த சேமிப்பு இந்தியாவுக்கு பாதுகாப்பு கவசமாக இருக்கும் என்றும் கூறப்பட்டுள்ளது.
மேலும், இந்தியாவில் எரிவாயு சேமிப்பு கிடங்குகளை அமைப்பதற்கும் இருநாடுகளும் ஒப்புக்கொண்டுள்ளன. எதிர்கால எரிசக்தி தேவைகளை பூர்த்தி செய்யவும், எரிவாயு சேமிப்பு திறனை அதிகரிக்கவும் இந்த திட்டங்கள் உதவும் என அதிகாரிகள் தெரிவித்துள்ளனர்.
இந்த ஒப்பந்தம், இந்தியா மற்றும் அமீரகம் இடையே நடைபெற்று வரும் உயர்மட்ட பேச்சுவார்த்தைகளின் போது கையெழுத்தாகியுள்ளது. எண்ணெய், எரிவாயு, வர்த்தகம் மற்றும் கட்டமைப்பு வளர்ச்சி உள்ளிட்ட துறைகளில் இருநாடுகளின் ஒத்துழைப்பு தொடர்ந்து அதிகரித்து வருகிறது.
இந்த புதிய ஒப்பந்தம், இந்தியாவின் எரிசக்தி பாதுகாப்பை மேலும் வலுப்படுத்துவதோடு, இந்தியா - அமீரகம் இடையேயான மூலோபாய கூட்டாண்மையையும் அடுத்த கட்டத்திற்கு கொண்டு செல்லும் முக்கிய முன்னேற்றமாக பார்க்கப்படுகிறது.
0 Comments